United Cement Group O‘zbekiston Respublikasi Investitsiyalar, sanoat va savdo vaziri bilan ochiq muloqotda ishtirok etdi

13.02.2026

9-fevral kuni O‘zbekiston Respublikasi Investitsiyalar, sanoat va savdo vaziri Laziz Qudratov rahbarligida Markaziy Osiyo mamlakatlari bilan iqtisodiy faoliyat olib borayotgan tadbirkorlar bilan ochiq muloqot bo‘lib o‘tdi. Tadbirda mintaqaning yetakchi kompaniyalaridan 30 dan ortiq vakillar, jumladan Markaziy Osiyoda qurilish materiallari ishlab chiqarish sohasidagi eng yirik sanoat xoldinglaridan biri bo‘lgan United Cement Group vakillari ham ishtirok etdi.

Uchrashuv davomida mintaqaviy iqtisodiy hamkorlikni rivojlantirish, eksport hajmlarini oshirish, qo‘shma investitsiya loyihalarini ishga tushirish hamda O‘zbekiston kompaniyalarining Markaziy Osiyo mamlakatlari bozorlaridagi ishtirokini kengaytirish masalalari muhokama qilindi.

United Cement Group sement va qurilish sanoatidagi aktivlarga ega bo‘lgan integratsiyalashgan sanoat xoldingi sifatida mintaqalararo kooperatsiyani mustahkamlash, eksport salohiyatini rivojlantirish hamda Markaziy Osiyo mamlakatlarida ishlab chiqarishni mahalliylashtirish bo‘yicha strategiyasini izchil amalga oshirib kelmoqda. Bunday muloqot maydonlarida ishtirok etish xoldingga qurilish materiallari yetkazib berishning barqaror zanjirlarini shakllantirish va soha uchun tizimli yechimlarni ishlab chiqishda bevosita ishtirok etish imkonini beradi.

Ochiq muloqot doirasida tadbirkorlar mahsulot eksporti jarayonida yuzaga kelayotgan bir qator amaliy muammolarni, jumladan chegara o‘tkazish punktlaridagi tartib-taomillar, transport xarajatlarini optimallashtirish hamda eksportchilarni davlat tomonidan qo‘llab-quvvatlash vositalarini takomillashtirish masalalarini ko‘tardilar. Barqaror va prognoz qilinadigan yetkazib berishni ta’minlash uchun mavjud ikki tomonlama va ko‘p tomonlama mexanizmlardan foydalangan holda kelishilgan yechimlarni ishlab chiqish zarurligi ta’kidlandi.

Ishtirokchilar alohida e’tiborni qo‘shni davlatlar hududida, avvalo qurilish materiallari ishlab chiqarish sohasida qo‘shma korxonalar tashkil etish istiqbollariga qaratdilar. Biznes vakillari mintaqada sanoat kooperatsiyasini kuchaytirishga xizmat qiladigan yirik sanoat loyihalarini amalga oshirish uchun moliyaviy instrumentlar va qo‘shma rivojlanish fondlari imkoniyatlaridan foydalanish muhimligini qayd etdilar.

2025-yil yakunlariga ko‘ra, O‘zbekiston Respublikasining Markaziy Osiyo mamlakatlari bilan o‘zaro tovar ayirboshlash hajmi 8 284,6 mln AQSh dollarini tashkil etib, 15,2 foizga o‘sishni ko‘rsatdi. Bu mintaqada iqtisodiy integratsiya va hamkorlikni yanada kengaytirish salohiyati yuqori ekanini tasdiqlaydi.

Uchrashuv yakunlariga ko‘ra, tadbirkorlar tomonidan ilgari surilgan har bir tashabbus bo‘yicha vazirlikning mas’ul xodimi biriktirildi va ularning o‘z vaqtida hamda sifatli amalga oshirilishi uchun shaxsiy javobgarlik belgilandi.

United Cement Group davlat institutlari va mintaqa biznes hamjamiyati bilan muloqotni Markaziy Osiyoning sanoat salohiyatini mustahkamlash hamda qurilish materiallari sohasida yagona iqtisodiy makonni shakllantirishga qaratilgan uzoq muddatli barqaror rivojlanish strategiyasining muhim tarkibiy qismi sifatida ko‘radi.